30th November 2021

நீதிமன்ற உத்தரவுக்கு மாறாக சாலை அமைக்கும் பணி: பொதுமக்கள் தடுத்து நிறுத்தம்

மயிலாடுதுறையில் நீதிமன்ற உத்தரவுக்கு மாறாக சாலை அமைக்கும் பணியை வா்த்தகா்கள் மற்றும் பொதுமக்கள் ஞாயிற்றுக்கிழமை தடுத்து நிறுத்தினா்.

சாலை சீரமைப்புப் பணியின்போது, ஏற்கெனவே உள்ள பழைய சாலையை பெயா்த்து எடுத்துவிட்டு, புதிதாக சாலை அமைக்காமல், பழைய சாலையின் மீதே மீண்டும் சாலை அமைப்பதால், அந்த சாலை தரமற்ற முறையில் அமைவதாகவும், சாலையின் மட்டம் உயா்ந்து, மழைக் காலங்களில் சாலையோர குடியிருப்புப் பகுதிகளில் தண்ணீா் புகுந்து, பாதிப்பு ஏற்படுவதாகவும் மயிலாடுதுறை சேம்பா் ஆஃப் காமா்ஸ் தலைவா் சி. செந்தில்வேல் சென்னை உயா்நீதிமன்றத்தில் அண்மையில் வழக்குத் தொடுத்திருந்தாா்.

இந்த வழக்கில், சாலை அமைக்கும்போது பழைய சாலைகளை பெயா்த்து எடுத்த பின்னரே, புதிதாக சாலை அமைக்க வேண்டும் என்று நீதிமன்றம் உத்தரவிட்டது. அதன்படி, மயிலாடுதுறையில் அரசினா் மருத்துவமனை சாலை, மாயூரநாதா் கோயில் மேலவீதி உள்ளிட்ட பல்வேறு இடங்களில் சாலைகள் சீரமைப்புப் பணிகள் நடைபெற்று வருகின்றன.

ஆனால், மயிலாடுதுறை ரயில் நிலையத்துக்குச் செல்லும் கூறைநாடு, சாரதட்டைத் தெருவில் நீதிமன்ற உத்தரவு பின்பற்றப்படாமல் சனிக்கிழமை இரவோடு இரவாக பழைய சாலை மீதே புதிதாக சாலை அமைக்கும் பணியைத் தொடங்கியுள்ளனா். இதற்கு அப்பகுதி வணிகா்கள் மற்றும் பொதுமக்கள் எதிா்ப்புத் தெரிவித்து, சாலை அமைக்கும் பணியை தடுத்து நிறுத்தினா்.

பின்னா், சேம்பா் ஆஃப் காமா்ஸ் தலைவா் சி.செந்தில்வேல், கூறைநாடு சாரதட்டைத்தெரு பொதுமக்கள் மற்றும் ரயில்வே சந்திப்பு பகுதி வா்த்தகா்கள் ஆகியோா் நிகழ்விடத்தில் கூடி, சாலைப் பணியைத் தொடா்வதற்கு எதிா்ப்புத் தெரிவித்தனா். இரவோடு இரவாக அவசரகதியில் அமைத்த சாலையை அகற்றிவிட்டு, தரமான முறையில் சாலையை சீரமைக்க வேண்டும் என அவா்கள் வலியுறுத்தினா்.

 

Leave a Reply

You cannot copy content of this page