மயிலாடுதுறை மாவட்டம் பூம்புகார் பகுதியில் இயங்கி வரும் புகழ்பெற்ற கலைக் கல்லூரி வளாகத்தில் சமூக விரோதிகளின் அத்துமீறல்கள் நாளுக்கு நாள் அதிகரித்து வருவதாக மாணவர்கள் மற்றும் ஆசிரியர்கள் இடையே பெரும் அதிர்ச்சியும் அச்சமும் ஏற்பட்டுள்ளது. கல்லூரி வளாகம் மற்றும் அதனைச் சுற்றியுள்ள பகுதிகளில் உடைந்த மது பாட்டில்களும் கஞ்சா புகையும் நிறைந்து காணப்படுவதால் மாணவர்களின் அத்தியாவசிய பாதுகாப்பு கேள்விக்குறியாகியுள்ளது.
இரவு நேரங்களில் கல்லூரி மைதானம் மற்றும் சுற்றுச்சுவரை ஒட்டிய பகுதிகளில் சட்டவிரோதமாக கூடும் மர்ம நபர்கள், மது அருந்திவிட்டு உடைந்த பாட்டில்களை ஆங்காங்கே வீசிச் செல்கின்றனர். இதனால் காலை நேரங்களில் கல்லூரிக்கு வரும் மாணவ, மாணவிகள் மற்றும் விளையாட்டுப் பயிற்சியில் ஈடுபடும் மாணவர்கள் காயமடைவதோடு பெரும் அசௌகரியத்திற்கும் ஆளாகின்றனர். மேலும், அப்பகுதியில் கஞ்சா போன்ற போதைப்பொருட்களின் பயன்பாடும் தடையின்றி நடப்பதாகக் குற்றச்சாட்டு எழுந்துள்ளது.
இந்த பாதுகாப்பற்ற சூழலால் குறிப்பாக பெண் மாணவிகள் மிகுந்த அச்சத்துடன் கல்லூரிக்கு வந்து செல்லும் நிலை நீடிக்கிறது. கல்லூரி சுற்றுவட்டாரப் பகுதிகளில் சமூக விரோதிகள் நடமாட்டம் அதிகரித்து வருவதால், கல்வி பயிலும் அமைதியான சூழல் கெட்டுப்போவதாக பெற்றோர்களும் அப்பகுதி சமூக ஆர்வலர்களும் கவலை தெரிவித்துள்ளனர்.
எனவே, மயிலாடுதுறை மாவட்ட காவல் துறை உடனடியாக தலையிட்டு, பூம்புகார் கல்லூரிப் பகுதியில் இரவு நேர ரோந்துப் பணியை தீவிரப்படுத்த வேண்டும் என்றும், சமூக விரோதிகள் மீது கடுமையான நடவடிக்கை எடுத்து மாணவர்களின் பாதுகாப்பை உறுதி செய்ய வேண்டும் என்றும் கோரிக்கை வலுத்து வருகிறது.