மயிலாடுதுறை அருள்மிகு மாயூரநாத சுவாமி திருக்கோயிலில் 1008 கலசாபிஷேகம் மற்றும் 108 சங்காபிஷேக சிறப்பு வழிபாடுகள் மிக விமர்சையாக நடைபெற்றன. இதில் திரளான பக்தர்கள் கலந்துகொண்டு சிவபெருமானை தரிசித்து ஆன்மீகச் சிலிர்ப்படைந்தனர்.
வரலாற்றுச் சிறப்புமிக்க இக்கோயிலில் சிறப்பு வழிபாட்டை முன்னிட்டு, யாகசாலை பூஜைகள் வெகு விமரிசையாகத் தொடங்கப்பட்டன. 1008 புனித கலசங்கள் மற்றும் 108 வலம்புரி சங்குகளில் புண்ணிய நதி தீர்த்தங்கள் நிரப்பப்பட்டு, வேத விற்பன்னர்களின் மந்திர முழக்கங்களுடன் சிறப்பு யாகங்கள் நடத்தப்பட்டன. தொடர்ந்து, யாகசாலையிலிருந்து புனித கலசங்கள் மற்றும் சங்குகள் புறப்பாடு செய்யப்பட்டு, மூலவர் மாயூரநாத சுவாமிக்கு மகா அபிஷேகம் நடைபெற்றது.
இந்த ஆன்மீக விழாவில் மயிலாடுதுறை, சீர்காழி, பூம்புகார் மற்றும் தரங்கம்பாடி உள்ளிட்ட சுற்றுவட்டாரப் பகுதிகளிலிருந்து ஏராளமான பக்தர்கள் கலந்துகொண்டு சுவாமி தரிசனம் செய்தனர். அபிஷேகத்திற்குப் பிறகு சுவாமி சிறப்பு அலங்காரத்தில் காட்சித்தர, மகா தீபாராதனை காண்பிக்கப்பட்டு பக்தர்களுக்குப் பிரசாதங்கள் வழங்கப்பட்டன. விழாவிற்கான ஏற்பாடுகளைக் கோயில் நிர்வாகத்தினரும் உள்ளூர் ஆன்மீக அன்பர்களும் சிறப்பாகச் செய்திருந்தனர்.