மயிலாடுதுறை மாவட்டம் பூம்புகார் மற்றும் தரங்கம்பாடி கடலோரப் பகுதிகளில் நடைபெற்று வரும் வளர்ச்சித் திட்டங்கள் மற்றும் கடல் அரிப்பு தடுப்புப் பணிகளை பார்வையிட அமைச்சர் நேரில் ஆய்வு மேற்கொண்டார். அப்போது எதிர்பாராதவிதமாக அமைச்சர் பாதுகாப்பு உபகரணங்களுடன் கடலுக்குள் குதித்து, ஆழ்கடலில் நடைபெறும் பணிகளின் தரத்தை நேரடியாக ஆய்வு செய்தது அப்பகுதி மக்களிடையே பெரும் ஆச்சரியத்தையும் வரவேற்பையும் ஏற்படுத்தியுள்ளது.
பூம்புகார் மீன்பிடி துறைமுகப் பகுதியில் மீனவர்களின் நீண்ட நாள் கோரிக்கையான ஆழ்கடல் தூர்வாரும் பணிகள் மற்றும் தூண்டில் வளைவு அமைக்கும் திட்டங்கள் குறித்து அதிகாரிகளிடம் கேட்டறிந்தார். தொடர்ந்து, கடலின் அடிப்பகுதியில் சீரமைக்கப்பட்டுள்ள கட்டமைப்புகளின் தன்மையை அறிய தாமதிக்காமல் கடலில் இறங்கி ஆய்வு பணிகளை மேற்கொண்டார். அமைச்சரின் இந்த துணிச்சலான செயல் அங்கு கூடி இருந்த மீனவர்களிடையே நெகிழ்ச்சியை ஏற்படுத்தியது.
இந்த ஆய்வின் போது சீர்காழி மற்றும் பூம்புகார் பகுதி மக்கள் பிரதிநிதிகள், மயிலாடுதுறை மாவட்ட துறை சார்ந்த உயர் அதிகாரிகள் உடன் இருந்தனர். ஆய்வு நிறைவில் செய்தியாளர்களிடம் பேசிய அமைச்சர், ‘மயிலாடுதுறை மாவட்ட மீனவர்களின் வாழ்வாதாரத்தை மேம்படுத்தவும், கடலோர கிராமங்களின் பாதுகாப்பை உறுதி செய்யவும் அரசு போர்க்கால அடிப்படையில் நடவடிக்கை எடுத்து வருகிறது’ என தெரிவித்தார்.