மயிலாடுதுறை மாவட்டத்தில் 18 வயது பூர்த்தியடைந்த புதிய வாக்காளர்கள் மற்றும் இதுவரை பட்டியலில் விடுபட்ட நபர்கள் தங்களது பெயர்களை சேர்ப்பதற்கான சிறப்பு முகாம் நாளை நடைபெற உள்ளது. மயிலாடுதுறை, சீர்காழி, பூம்புகார், தரங்கம்பாடி மற்றும் செம்பனார்கோவில் உள்ளிட்ட அனைத்து ஒன்றியங்களுக்கு உட்பட்ட வாக்குச்சாவடி மையங்களிலும் இம்முகாம் நடைபெறவுள்ளது.
இம்முகாமில் புதிய வாக்காளர்கள் சேர்க்கைக்கான படிவம் 6, பெயர் நீக்கத்திற்கான படிவம் 7, மற்றும் முகவரி மாற்றம், திருத்தங்களுக்கான படிவம் 8 ஆகியவை பெறப்படும். 18 வயது நிறைவடைந்த இளம் வாக்காளர்கள் தங்களது வயது சான்று, முகவரி சான்று மற்றும் பாஸ்போர்ட் அளவு புகைப்படத்துடன் அருகில் உள்ள வாக்குச்சாவடி மையங்களுக்கு சென்று விண்ணப்பிக்கலாம்.
மாவட்டத்தின் அனைத்து தரப்பு இளைஞர்களும் ஜனநாயக கடமையாற்ற இந்த வாய்ப்பை முழுமையாக பயன்படுத்திக் கொள்ள வேண்டும் என மாவட்ட நிர்வாகம் சார்பில் கேட்டுக்கொள்ளப்பட்டுள்ளது. மேலும், வாக்காளர் உதவி செயலி (Voter Helpline App) மூலமாகவும் இணையவழியில் விண்ணப்பிக்க வசதிகள் செய்யப்பட்டுள்ளன.