மயிலாடுதுறை: மயிலாடுதுறை மாவட்டம் தரங்கம்பாடி தாலுகா, முனிவேலங்குடி கிராமத்தில் அமைந்துள்ள 5 பழமைவாய்ந்த திருக்கோயில்களின் மகா கும்பாபிஷேக பெருவிழா வெகு விமர்சையாகவும் கோலாகலமாகவும் நடைபெற்றது. ஒரே கிராமத்தில் அமைந்த ஐந்து திருக்கோயில்களுக்கு ஒரே நாளில் கும்பாபிஷேகம் நடைபெற்ற சம்பவம் அப்பகுதி மக்களிடையே பெரும் ஆன்மீக நெகிழ்ச்சியையும் மகிழ்ச்சியையும் ஏற்படுத்தியுள்ளது.
இவ்விழாவை முன்னிட்டு கடந்த சில நாட்களுக்கு முன்பு கணபதி ஹோமம், விக்னேஸ்வர பூஜை மற்றும் முதற்கால யாகசாலை பூஜைகளுடன் விழா தொடங்கியது. தொடர்ந்து, புனித நதிகளிலிருந்து கொண்டுவரப்பட்ட தீர்த்தக் கடங்களுக்கு சிறப்பு பூஜைகள் செய்யப்பட்டன. கும்பாபிஷேக நாளான இன்று யாகசாலையிலிருந்து கடங்கள் புறப்பட்டு, மேளதாளங்கள் முழங்க கோயிலைச் சுற்றி ஊர்வலமாக எடுத்து வரப்பட்டு, சிவாச்சாரியார்களின் வேத மந்திரங்கள் முழங்கக் கோபுர கலசங்களில் புனித நீர் ஊற்றப்பட்டு மகா கும்பாபிஷேகம் மிகச் சிறப்பாக நடைபெற்றது.
இந்த ஆன்மீக விழாவில் முனிவேலங்குடி மற்றும் அதனைச் சுற்றியுள்ள தரங்கம்பாடி, செம்பனார்கோவில் உள்ளிட்ட பல்வேறு கிராமங்களில் இருந்து ஆயிரக்கணக்கான பக்தர்கள் கலந்துகொண்டு சாமி தரிசனம் செய்தனர். கும்பாபிஷேகத்தை தொடர்ந்து அனைத்து பக்தர்களுக்கும் பேரருள் பிரசாதமும், பிரம்மாண்ட அன்னதானமும் வழங்கப்பட்டது. விழாவிற்கான பாதுகாப்பு மற்றும் அடிப்படை வசதி ஏற்பாடுகளைக் கிராம முக்கியஸ்தர்கள், ஊர் பொதுமக்கள் மற்றும் விழாக்குழுவினர் இணைந்து சிறப்பாகச் செய்திருந்தனர்.