மயிலாடுதுறை மாவட்டம், சீர்காழி மற்றும் பூம்புகார் கடலோரப் பகுதிகளை உள்ளடக்கிய வங்கக் கடலில் எண்ணெய்க் கிணறு அமைப்பதற்கு அமெரிக்க நிறுவனத்திற்கு அனுமதி வழங்கக் கூடாது என்று பாட்டாளி மக்கள் கட்சியின் தலைவர் அன்புமணி ராமதாஸ் மத்திய, மாநில அரசுகளுக்கு வலியுறுத்தியுள்ளார். காவிரி டெல்டா மாவட்டங்களின் கடலோரச் சூழலை பாதிக்கும் வகையில் இத்தகைய திட்டங்கள் செயல்படுத்தப்படுவது கடும் கவலையளிப்பதாக அவர் தெரிவித்துள்ளார்.
இதுகுறித்து அவர் வெளியிட்டுள்ள அறிக்கையில், மயிலாடுதுறை கடற்பகுதியில் ஆய்வு மற்றும் உற்பத்திப் பணிகளுக்காக எண்ணெய்க் கிணறுகள் தோண்டுவது, அப்பகுதியில் உள்ள பல்லுயிர் பெருக்கத்திற்கும், மீன் வளத்திற்கும் பெரும் அச்சுறுத்தலாக அமையும் என்று சுட்டிக்காட்டியுள்ளார். தரங்கம்பாடி, பூம்புகார் உள்ளிட்ட கடலோர கிராமங்களைச் சேர்ந்த பல்லாயிரக்கணக்கான மீனவர்களின் வாழ்வாதாரம் இதனால் முற்றிலும் முடங்கும் அபாயம் ஏற்பட்டுள்ளது.
காவிரி டெல்டா பகுதி ஏற்கனவே பாதுகாக்கப்பட்ட வேளாண் மண்டலமாக அறிவிக்கப்பட்டுள்ள நிலையில், கடல்வளத்தையும் நிலவளத்தையும் அழிக்கும் எந்தவொரு ஹைட்ரோகார்பன் அல்லது எரிசக்தி திட்டங்களுக்கும் இடம் அளிக்கக் கூடாது என அவர் கேட்டுக்கொண்டார். மக்களின் எதிர்ப்பையும் மீனவர்களின் வாழ்வாதாரத்தையும் மீறி அமெரிக்க நிறுவனத்திற்கு அனுமதி அளித்தால், கடலோர மக்களைத் திரட்டிப் பெருந்திரள் போராட்டங்கள் நடத்தப்படும் என்றும் எச்சரித்துள்ளார்.