மயிலாடுதுறை மாவட்டத்திற்குட்பட்ட பூம்புகார், தரங்கம்பாடி உள்ளிட்ட கடலோரப் பகுதிகளில் ஹைட்ரோ கார்பன் கிணறுகள் அமைப்பதற்கான ஆய்வுகளை மேற்கொள்ள அனுமதி வழங்கக் கூடாது என அப்பகுதி மீனவர்களும், சமூக ஆர்வலர்களும் அரசுக்குக் கோரிக்கை விடுத்துள்ளனர். காவிரி டெல்டா மாவட்டங்களை பாதுகாக்கப்பட்ட வேளாண் மண்டலமாக அறிவித்துள்ள நிலையில், கடல் பகுதியில் இது போன்ற திட்டங்களைக் கொண்டுவருவது ஒட்டுமொத்த சுற்றுச்சூழலையும் பாதிக்கும் என அவர்கள் கவலை தெரிவித்துள்ளனர்.
தரங்கம்பாடி முதல் பழையாறு வரையிலான கடலோரப் பகுதிகளில் ஆயிரக்கணக்கான குடும்பங்கள் மீன்பிடித் தொழிலை மட்டுமே நம்பி வாழ்ந்து வருகின்றன. கடல் பகுதியில் ஹைட்ரோ கார்பன் கிணறுகள் அமைக்கப்பட்டால், கடல் நீர் மாசுபாடு அடைந்து மீன் வளம் கடுமையாகப் பாதிக்கப்படும். இதனால், பாரம்பரிய மீனவர்களின் வாழ்வாதாரம் கேள்விக் குறியாகும் அபாயம் ஏற்பட்டுள்ளதாக அப்பகுதி மீனவ அமைப்புகள் குற்றம்சாட்டுகின்றன.
ஏற்கனவே நிலப்பகுதியில் ஹைட்ரோ கார்பன் திட்டங்களுக்கு மக்கள் கடும் எதிர்ப்பு தெரிவித்து வரும் நிலையில், தற்போது கடல் பகுதியில் மேற்கொள்ள திட்டமிடப்படும் ஆய்வுப் பணிகளுக்கும் முற்றுப்புள்ளி வைக்க வேண்டும் என்று அனைத்து அரசியல் கட்சிகளும், விவசாய சங்கங்களும் வலியுறுத்தி வருகின்றன. தமிழ்நாடு அரசு உடனடியாக தலையிட்டு, மயிலாடுதுறை கடல் பகுதியை ஹைட்ரோ கார்பன் திட்டங்களிலிருந்து முழுமையாக விலக்களிக்க நடவடிக்கை எடுக்க வேண்டும் என உள்ளூர் மக்கள் எதிர்பார்க்கின்றனர்.