மயிலாடுதுறை மாவட்ட கடல் பகுதியில் ஹைட்ரோகார்பன் மற்றும் எண்ணெய் கிணறுகள் அமைக்க அரசு அனுமதி அளித்தால், மீனவர்கள் மற்றும் விவசாயிகளை ஒன்றிணைத்து மாவட்டம் தழுவிய அளவில் மாபெரும் தொடர் போராட்டங்கள் நடத்தப்படும் என உள்ளூர் சங்கங்கள் தீவிர எச்சரிக்கை விடுத்துள்ளன.
பூம்புகார், தரங்கம்பாடி, சீர்காழி உள்ளிட்ட கடலோரப் பகுதிகளில் புதிய எண்ணெய் கிணறுகள் அமைக்கப்பட்டால் கடல்சார் வளங்கள் கடுமையாகப் பாதிக்கப்பட்டு, மீனவர்களின் வாழ்வாதாரம் கேள்விக் குறியாகும். மேலும், கடல்வழியாக நிலத்தடி நீரில் உப்புநீர் புகுந்து காவிரி பாசன மாவட்டமான மயிலாடுதுறையின் வேளாண் நிலங்கள் அனைத்தும் பாழாகும் அபாயம் உள்ளதாக அப்பகுதி பொதுமக்கள் அஞ்சுகின்றனர்.
டெல்டா மாவட்டங்கள் பாதுகாக்கப்பட்ட வேளாண் மண்டலமாக அறிவிக்கப்பட்டுள்ள நிலையில், அதற்கு முரணாக இத்தகைய ஆழ்கடல் மற்றும் கடலோர எண்ணெய் கிணறு திட்டங்களைச் செயல்படுத்த முயற்சிப்பது ஏற்றுக்கொள்ள முடியாதது என விவசாயிகள் தரப்பில் சுட்டிக்காட்டப்பட்டுள்ளது. எனவே, மத்திய மற்றும் மாநில அரசுகள் இத்திட்டத்துக்கான அனுமதியை உடனடியாகத் திரும்பப்பெற வேண்டும் என்றும், தவறினால் கடல் முற்றுகை மற்றும் சாலை மறியல் போராட்டங்கள் வெடிக்கும் என்றும் கடலோர கிராம முக்கியஸ்தர்கள் தெரிவித்துள்ளனர்.